НАЈНОВО ОД ДЕБАРСКО-КИЧЕВСКАТА ЕПАРХИЈА

„Знаејќи те како свет ковчег, кој ги носи зборовите на заветот Божји, кој спасува мноштво Македонци во вечната земја на ветувањето, водени кон вечниот живот, го почитуваме гробот на твоите свети мошти“ (песна од канонот на Утрена на преп. Наум Охридски Чудотворец).

И оваа година, празникот на преподобниот Наум Охридскиот Чудотворец, собратот Климентов, кој го учеше во верата македонскиот народ, беше торжествено одбележан во Светинаумовиот манастир во Охрид, во неговото вечно почивалиште. Празнувањето започна на 04.01.2020 година, во вечерните часови, со Вечерна богослужба, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, протоереј-ставрофорите Никола Христоски и Димче Ѓорѓиески, свештениците Димче Азески и Љупчо Бакрачески и протоѓаконот Николче Ѓурѓиноски. Утредента, на 05.01.2020 година, беше отслужена света архиерејска Литургија, на која чиноначалствуваше Митрополитот Тимотеј, во сослужение на архимандритот Нектариј, протоереј-ставрофорите Никола Христоски и Димче Ѓорѓиески, свештениците Атанас Казанџиски, Димче Азески и Љупчо Бакрачески и протоѓаконот Николче Ѓурѓиноски. По завршувањето на Литургијата, беше извршен чинот на Мал Водосвет и беше прекршен празничниот колач, а Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме. 

„Се јави како нов Авраам, Николае, зашто Единородниот Син Му Го приведе на Твојот Господ, принесувајќи постојано бескрвни жртви. Затоа си благословен како странољубец, отче, зашто си бил божествено и непорочно живеалиште на Света Троица“ (песна од канонот на Утрена на св. Николај Мирликиски Чудотворец).

На 19.12.2019 година, денот кога го славиме споменот на великиот св. Николај Мирликиски Чудотворец, образот на кротоста и правилото на верата, во храмот „Св. Никола Геракомија“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Партениј, протоерејот-ставрофор Никола Христоски, протоерјеот Љупчо Симиџиески, еромонахот Доситеј, протоѓаконот Николче Ѓурѓиноски и ероѓаконот Анатолиј. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме. 

„Имајќи во себе чувства за единствените и бескрајни убавини од Бога, посака нив постојано да ги гледаш, затоа радосно воскликнуваш, отче Нектарие: Пејте Го Господа сите созданија и превознесувајте Го во сите векови“ (песна од канонот на Утрена на преп. Нектариј Битолски).

Споменот на преподобниот Нектариј Битолски и на св. Сава Освештен, и оваа година, свечено беше прославен во параклисот „Св. Кирил и Методиј“ во манастирот „Св. Наум Охридски“ во Охрид. Празнувањето започна на 17.12.2019 година со празнична Вечерна богослужба, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, протоереј-ставрофорите Никола Христоски и Димче Ѓорѓиески и свештеникот Димче Азески. По завршувањето на Вечерната богослужба, беше осветено коливото и беше прекршен празничниот колач, а во чест на именденот на архимандритот Нектариј. Прославата на великите подвижници продолжи утредента, на 18.12.2019 година, кога беше отслужена света архиерејска Литургија, на која чиноначалствуваше Митрополитот Тимотеј, во сослужение наархимандритот Нектариј, протоерејот-ставрофор Никола Христоски и протоѓаконите Ратомир Грозданоски и Николче Ѓурѓиноски. По завршувањето на Литургијата, Митрополитот Тимотеј се обрати кон верниците со пригодна беседа, која подолу во целост ви ја пренесуваме. Од името на нашиот Митрополит, свештенството и монаштвото, како и од сите верни чеда од нашата Епархија, му го честитаме именденот на архимандритот Нектариј, со желби и молитви за крепко здравје, а преп. Нектариј секогаш да биде негов заштитник и покровител пред Бога, та уште многу години мудро, достојно и со голема љубов да го води Светинаумовиот манастир.  

„Непрестајно моли Го Господа за нас кои ти пееме, блажени, како Христов маченик, како оној што мачителот го победи, како изгонител на лукавите духови, како буден пазител, како непосрамен застапник“ (песна од канонот на Утрена на св. вмч. Ѓорѓи Победоносец).

На 09.12.2019 година, денот кога го прославуваме споменот на св. вмч. Ѓорѓи Победоносец, на преп. Алимпиј Столпник и на св. Стилијан, во храмот „Св. вмч. Ѓорѓи“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протереј-ставрофорите Никола Христоски, Сашо Богданоски, Димче Ѓорѓиески и Игор Никовски, свештеникот Димче Азески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниците со пригодна беседа, која интегрално ви ја пренесуваме.

„Оние што со вера остануваат во твојот свет храм, отче, просат милост од Бога, богатејќи се со тебе - застапникот и најтопол учител на животот, вистинско спасение на душите и непосрамен лекар на страстите“ (песна од канонот на Утрена ан св. Климент Охридски Чудотворец).

Празнувањето на заштитникот и таткото на нашата света Македонска православна црква - Охридска архиепископија и патронот на градот Охрид, светиот Климент Охридскиот Чудотворец , како и на св. Климент Папа Римски, започна на 07.12.2019 година, во манастирот „Св. Климент и Пантелејмон“ на Плаошник во Охрид, со Вечерна богослужба, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Никола Христоски, Димче Ѓорѓиески и Игор Никовски, свештениците Димче Азески, Ѓорѓи Блажевски и Љупчо Бакрачески и протоѓаконот Николче Ѓурѓиноски. По завршувањето на Вечерната богослужба, пред моштите на светителот беше отслужен и Молебен кон св. Климент Охридски Чудотворец.