НАЈНОВО ОД ДЕБАРСКО-КИЧЕВСКАТА ЕПАРХИЈА

Пеејќи ја спасителната песна, дојдете сите верни, да се поклониме во домот на Господа, велејќи: Ти, Кој на Крстот се распна, и од мртвите воскресна, и Кој си во прегратките на Отецот, очисти ги нашите гревови“ (песна на Господи повикав... на Вечерна во Светата и велика Недела на Пасха).

На 19.04.2020 година, во Светата и велика Недела на Пасха, во поладневните часови, кога го празнуваме таканареченото Второ Воскресение Христово, во катедралниот храм „Св. Софија“ во Охрид, беше отслужена свечена воскресна Вечерна богослужба, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски и Сашо Богданоски, свештениците Димче Азески, Горан Ставрески, Ѓорѓи Блажевски, Љупчо Бакрачески и Александар Димоски и протоѓаконот Николче Ѓурѓиноски. На Вечерната богослужба, беше прочитано и Евангелието според Јован (Јн. 20, 19-25), на повеќе јазици, а по завршетокот на богослужбата . Митрополитот Тимотеј се обрати кон верниците со пригодна беседа, која интегрално ви ја пренесуваме. 

„О, Пасха велика и најсветла, Христе! О, Мудрост и Слово Божјо, и сило! Давај ни поцелосно да се причестуваме со Тебе во невечерниот ден на Твоето Царство“ (песна од канонот на Утрена на Воскресение Христово).

На 19.04.2020 година, денот на Празникот над празниците, денот кога сета вселена се радува и весели, зашто Христос Воскресна и на сите ни дарува живот, во манастирот „Св. Климент и Пантелејмон“ на Плаошник во Охрид, свечено беше дочекан најрадосниот ден за човечкиот род, Христовото Воскресение. По објавата на најрадосната вест, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештеникот Љупчо Бакрачески и протоѓаконот Николче Ѓурѓиноски. Пред почетокот на Литургијата, беше прочитано и Велигденското послание од Архиепископот Охридски и Македонски г.г. Стефан, заедно со архиереите на МПЦ-ОА, кое ви го пренесуваме во целост.  

„Спасителу мој, Кој си горе на престолот, Ти пеам песна проштална и погребна, Тебе, Кој со Твоето погребение ми ги отвори вратите на животот и, со смртта - смртта и адот ги уништи“ (песна од канонот на Утрена на Велика Сабота).

На 17.04.2020 година, на Велики Петок навечер, кога го славиме боготелесното погребение и слегувањето во адот на Господ Бог и Спасителот наш Исус Христос, во манастирот „Св. Климент и Пантелејмон“ на Плаошник во Охрид, беше отслужена Утрена богослужба со Опелото на Господа Исуса Христа, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештеникот Љупчо Бакрачески и протоѓаконот Николче Ѓурѓиноски. По завршувањето на богослужбата, Митрополитот Тимотеј се обрати кон верниот народ со пригодна беседа, која интегрално ви ја пренесуваме. 

„Сета твар се менуваше од страв, гледајќи Те како висиш на крстот, Христе: сонцето се помрачи, и основите на земјата се тресеа: сите сострадаа со Оној Кој создал сѐ: Господи, Кој доброволно претрпе заради нас, слава Ти“ (Стиховна стихира на Утрена на Велики Петок).

На 16.04.2020 година, на Велики Четврток навечер, кога според Типикот на православната Црква се служи Утрената на Велики Петок, а кога ги славиме светите, спасителни и страшни страдања на Господа Бога и Спасителот наш Исус Христос, во манастирот „Св. Климент и Пантелејмон“ беше отслужена Утрена богослужба со читање на 12-те страдални Евангелија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештеникот Љупчо Бакрачески и протоѓаконот Николче Ѓурѓиноски. Во текот на утрената богослужба, насреде храмот беше изнесен Крстот со Распнатиот Христос, а верниот народ пристапи да се поклони пред Јагнето Божјо, Кое доброволно отиде на страдања и распнување, и преку Кое ни се дарува прошка на гревовите и живот вечен.

„Јагнето што го навести пророк Исаија, оди на доброволно колење, и дозволува да биде биено по плеќите и образите; без да го свртува лицето од плуканиците, на срамна смрт се осудува: и Он, безгрешниот, доброволно прима сѐ, за да им дарува на сите воскресение од мртвите“ (Стихира на Господи повикав... на Вечерна на Велики Четврток).

На 16.04.2020 година, на Велики Четврток наутро, кога ги празнуваме миењето на нозете, Тајната вечера, свештената молитва и предавството Јудино, во храмот „Пресвета Богородица Перивлепта“ во Охрид, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, протоерејот Љупчо Симиџиески, свештеникот Љупчо Бакрачески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниците со пригодна беседа, којашто интегрално ви ја пренесуваме.