НАЈНОВО ОД ДЕБАРСКО-КИЧЕВСКАТА ЕПАРХИЈА

„Кога Севишниот слезе и ги измеша јазиците, тогаш ги раздели народите; а кога ги разделуваше огнените јазици, сите луѓе ги повика на единство, и сите заедно Го славиме Сесветиот Дух“ (кондак на Педесетница).

На 07.06.2020 година, во Неделата на светата Педесетница - Духовден, во храмот „Св. Троица“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот Кирил Јованоски, свештениците Горан Ставрески и Љупчо Бакрачески и протоѓаконот Николче Ѓурѓиноски. По завршувањето на Литургијата, а според црковниот типик, беше отслужена и Вечерната богослужба, на која се читаат духовденските молитви, а во се помоливме за здравје и спасение на нашиот народ, за прошка на гревовите, како и за покој на душите на сите порано починати браќа и сестри со надеж за воскресение и вечен живот. На крајот, беше извршен чинот на Мал водосвет и беше прекршен празничниот колач, а се направи и литија околу светиот храм. 

„Предвечниот и беспочетен Бог, откако ја прими човечката природа и тајно ја обожи, денес ја вознесе. Ангелите претходат и на учениците им Го покажуваат Господа, Кој оди на небесата со голема слава. Откако Му се поклонија, тие говореа: Слава Му на Бога, Кој се вознесе“ (седален по второ стихословие на Утрена на Вознесение Христово). 

На 28.05.2020 година, на денот кога нашиот Спасител Господ Исус Христос се вознесе во слава и седна од десната страна на Отецот, а со тоа ѝ даде неискажлива чест и на човековата природа, во ман. „Вознесение Христово“ („Св. Спас“) во с. Г. Лакочереј, Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски и Димче Ѓорѓиески, протоерејот Кирил Јованоски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, која подолу во целост ви ја пренесуваме. На крајот, верниот народ, предводен од свештенството, тргна на свечена литија, најпрво околу манастирскиот храм, а потоа и во манастирското поле, каде сите заедно се помолија за благотворен воздух, мирни времиња, прошка на гревовите и избавување од сите болести и опасности. Во продолжение ви ја пренесуваме беседата на Митрополитот Тимотеј.

„Учители свети, вашиот спомен светло празнувајќи го, од сѐ срце ве молиме: народите што ги збогативте со ризницата на Евангелието, утврдете ги врз каменот на Христовото исповедање, и нашиот живот во мир запазете го“ (светилен на Утрена на празникот на св. рамноапостолни Кирил и Методиј).

На 24.05.2020 година, во Шестата недела по Пасха - Неделата на слепиот и на празникот на светите рамноапостолни сесловенските и македонски просветители Кирил и Методиј, во параклисот „Св. Кирил и Методиј“ во ман. „Св. Наум Охридски“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски г. Тимотеј, во сослужение на архимандритот Нектариј, игумен на манастирот, протоерејот-ставрофор Никола Христоски и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниците со пригодна беседа, која интегрално ви ја пренесуваме.

„Нека се радува небото, нека ликуваат земните, оти Христос се јави како човек од Дева, и со Својата смрт го избави целото човештво од распадливоста; а на жената Самарјанка, која бараше вода, ѝ даде извор на исцеленија, како единствен бесмртен, Кој засветли со чудеса“ (седален на Утрена во Петта недела по Пасха).

На 17.05.2020 година, во Петтата недела по Пасха - Неделата на Самарјанката, и на празникот на св. мч-чка Пелагија Тарсиска и св. свешт-мч. Силуан, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тиммотеј изврши осветување на параклисот „Св. Николај Мирликиски Чудотворец“ во ман. „Св. Јован Крстител“ - Бигорски манастир. Параклисот е во склоп на Источен палат, чии темели се поставени на 07.07.2009 година, а овој параклис е изграден со заложбите на високопреподобниот игумен на манастирот, архимандритот Партениј. Параклисот е живописан во 2014 година од страна на зографот Горан Боев, монахот Аверкиј и браќата од овој свет манастир, кои и го позлатија иконостасот. По осветувањето, беше отслужена и првата света Литургија, на која чиноначалствуваше Митрополитот Тимотеј, во сослужение на архимандритот Партениј, протоерејот-ставрофор Никола Христоски, еромонасите Ефросиниј и Кирил и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати со пригодна беседа, којашто подолу ви ја пренесуваме во целост. На самиот крај, беше отслужена и Трисагија за покој на душата на скоро починатиот почитуван професор на Православниот богословски факултет во Скопје, проф. Петко Златески. 

„Ете, пролетта на благодатта болсна, Христовото восресение им засветли на сите, а со него свети и сепразичниот и светлоносен ден на маченикот Георгија. Дојдете сите, носејќи свеќи, божествено и светло да празнуваме“ (седален на Утрена на св. вмч. Георгиј Победоносец).

На 07.05.2020 година, ден по прославата на споменот на св. вмч. Георгиј Победоносец, и оваа година беше прородлжена долговековната традиција во Струга, каде што во спомен на овој свидетел со маченички венец со векови ја потврдува силата на христијанството, дадена во Црквата во која престојува Утешителот - Светиот Дух. Во слава и чест на великиот маченик Георгиј, овој ден торжествено започна со света архиерејска Литургија во храмот „Св. вмч. Георгиј“ во Струга, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Никола Христоски, протоерејот Васко Голабоски, свештениците Александар Димоски и Христијан Костоски и протоѓаконот Николче Ѓурѓиноски. Празничните торжества продолжија во поладневите часови со свечена Вечерна богослужба, на која чиноначалствуваше Митрополитот Тимотеј, во сослужение на архимандритите Нектариј и Партениј, протоерејот-ставрофор Никола Христоски, свештеникот Христијан Костоски и пртоѓаконот Николче Ѓурѓиноски. По завршувањето на Вечерната богослужба, беше отслужен Парастос за сите порано упокоени ктитори, свештеници, монаси, пејачи, епитропи и сите кои помагале во овој наш свет храм. Потоа верниот народ, предводен од свештенството и монаштвото, на чело со нашиот Митрополит Тимотеј, се упати на патот на свечената литија (еордија), пеејќи воскресенски радосни песни, тропарот на св. вмч. Георгиј и поздравувајќи се еден со друг со најторжествениот поздрав: Христос воскресе! Пред започнувањето на Литијата, Митрополитот Тимотеј се обрати кон верниот народ со пригодна беседа, којашто ви ја пренесуваме во целост.