НАЈНОВО ОД ДЕБАРСКО-КИЧЕВСКАТА ЕПАРХИЈА

„Сигурните и богогласни проповедници, врвот на апостолите Твои, Господи, си ги примил во наслада и покој на Твоите добра, бидејќи нивните страдања и смрт си ги примил подобро од секоја првина, Ти, Кој единствен знаеш да ги читаш срцата на луѓето“ (кондак на Утрена на св. апостоли Петар и Павле - Петровден).

На 12.07.2021 година, денот кога го славиме споменот на светите славни, сефални и првоврховни апостоли Петар и Павле, во храмот „Св. Петар и Павле“ во Кичево, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритите Нектариј и Доситеј, свештениците Александар Матески и Александар Крстаноски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, којашто во целост ви ја пренесуваме. 

„Порано неплодната, денес го раѓа Христовиот Претеча, и тој е исполнувањето на сите пророштва. Во (реката) Јордан, тој ја положи раката врз Оној Кого Го навестуваа пророците; се јави пророкот на Божјото Слово, истовремено проповедник и претеча“ (кондак на Утрена на празникот Рождество на чесниот славен пророк, претеча и Крстител Јован).

На 07.07.2021 година, на денот кога го прославуваме Рождеството на чесниот славен пророк, претеча и Крстител Јован, во манастирот „Св. Јован Крстител“ - Бигорски манастир, беше отслужена света архиерејска Литургија, на којашто иноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на Митрополитот Тетовско-гостиварски г. Јосиф, Епископот Антаниски г. Партениј, игуменот Фотиј, еромонасите Доситеј, Макариј, Еразмо, Ефросиниј и Кирил, свештениците Горан Ставрески, Љупчо Бакрачески, Бобан Митевски, Павел Крцоски, Александар Димоски, Крсте Тасески и Јове Тренчески, протоѓаконот Николче Ѓурѓиноски и ероѓаконите Порфириј, Силуан и Анатолиј. Овој празничен ден стана уште поторжествен за еромонахот Доситеј и за ѓаконот Анатолиј, а со тоа и за Бигорскиот манастир. Имено, со одлука на САС на МПЦ-ОА, а по предлог на Митрополитот Тимотеј, еромонахот Доситеј беше награден со архимандритско достоинство, а Митрополитот Тимотеј ја спроведе истата токму на овој торжествен ден. По повод овој чин, игуменот на манастирот Епископот Партениј го дарува новиот архимандрит Доситеј со прекрасен граден крст. Ероѓаконот Анатолиј, пак, се удостои од раката на нашиот Митрополит да го прими еромонашкиот чин. На двајцата од името на нашот Митрополит и сите верни чеда на Дебарско-кичевската епархија срдечно им честитаме и се молиме Господ нашиот Бог да ги води по стапките на Неговите заповеди. По завршувањето на Литургијата, беше осветено коливото, а Митрополитот Тимотеј се обрати кон верниците со пригодна беседа, којашто интегрално ви ја пренесуваме.

„Богоносен Науме, себлажен, ти си им бил на сите чудотворец, молитвеник и патеводител кон Бога. Пофалбо мизиска, ти се молиме, избави ги твоите раби од сегашните неволји и од идниот пламен, со твоето божествено молење“ (седален по второ стихословие на Утрена на преп. Наум Охридски).

Торжествувањето на преподобниот Наум Охридскиот Чудотворец продолжи на 03.07.2021 година, во манастирот над Охридското Езеро, во кој поминаа илјадници верници за да му се поклонат на нашиот застапник пред Бога. Празнувањето беше запечатено со света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, свештениците Димче Азески и Горан Ставрески, еромонахот Ефросиниј, протоѓаконот Николче Ѓурѓиноски и ѓаконот Васил Михајлоски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон неизбројниот верен народ со пригодна беседа, којашто подолу интегрално ви ја пренесуваме.

„Дојдете верници да го воспееме пречесниот Христов војник, светлиот светилник на мизиските земји, кој јасно свети со чудеса и кон него да запееме: Спомнувај не сите нас, кои го празнуваме твојот спомен и кои те повикуваме на помош; и бидејќи имаш смелост пред Господа, моли да се спасиме“ (стихира на Господи повикав... на Вечерна на преп. Наум Охридски).

Споменот на преп. Наум Охридскиот Чудотворец започна да се слави на 02.07.2021 година, во манастирот каде што тој се подвизуваше пред Господа и каде многумина исцели од секакви болести, а на крајот и каде што ги остави своите свети мошти, за оние кои веруваат во него, и по многу години и од неговото блажено упокојување, да добиваат утешение и исцеление. Прославувањето на преподобниот започна со Вечерна богослужба на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, свештениците Димче Азески и Горан Ставрески, еромонахот Ефросиниј, протоѓаконот Николче Ѓурѓиноски и ѓаконот Васил Михајлоски. По завршувањето на Вечерната богослужба, Митрополитот Тимотеј се обрати кон верниците со пригодна беседа, којашто во целост ви ја пренесуваме.

„Како првини на природата, Засадителу на тварта, вселената Ти ги принесува, Господи, Твоите богоносни маченици. По нивните молитви, Многумилостиве, во длабок мир запази ја Црквата Твоја и народот Твој, преку Богородица“ (кондак на Утрена во Неделата на сите светии).

На 27.06.2021 година, во Неделата на сите светии, во манастирот „Сите светии“ („Си свети“) во с. Лешани, Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Никола Христоски, еромонахот Вартоломеј, свештеникот Александар Димоски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, којашто интегрално ви ја пренесуваме.