НАЈНОВО ОД ДЕБАРСКО-КИЧЕВСКАТА ЕПАРХИЈА

Овој ден го создаде Бог, за да се зарадуваме и развеселиме во него. Христос воскресна од мртвите, со смртта ја победи смртта, и на оние во гробовите им даде живот вечен. Затоа нека се весели небесата и нека се радува земјата и нека празнуваат сите, зашто воскресна Христос, нашата вечна радост!

На 16.04.2017 година, на најсветлиот ден на Воскресението Христово, денот кога дојде спасението за целиот свет, централната прослава на Дебарско-кичевската епархија се одржа во манастирот „Св. Климент и Пантелејмон“ на Плаошник во Охрид, каде беше објавено Воскресението Христово и каде беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоерејот Никола Христоски, свештеникот Љупчо Бакрачески и протоѓаконот Николче Ѓурѓиноски. На овој најсветол ден присуствуваше неизброен верен народ, како од Македонија, така и од сите страни на светот, а меѓу присутните беше и Претседателот на собранието на Р. Македонија, г-дин Трајко Вељаноски. По објавувањето на најрадосната вест, беше прочитано и Велигденското послание на Архиепископот Охридски и Македонски г.г. Стефан, кој, заедно со членовите на Светиот архиерејски синод на Македонската православна црква - Охридска архиепископија, го испрати до сите верни чеда, а истото ви го пренесуваме во целост.

„Со смртта го преобразуваш смртното, а со погребението гнилежното го претвораш во негнилежно, и со Твоето Божество нè извлекуваш од бездната, зашто Твоето тело, Владико, не виде распаѓање, ниту Твојата душа беше оставена во адот странец да биде“ (песна од Канонот на Утрена на Велика Сабота).

На денот кога го празнуваме боготелесното погребение и слегувањето во адот на нашиот Спасител, Господ Исус Христос, на Велики Петок навечер, во храмот „Св. вмч. Ѓорѓи“ во Охрид, беше отслужена Утрена богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Сашо Богданоски и Димче Ѓорѓиески, протоерејот Игор Никовски, свештеникот Роберт Илијевски и протоѓаконот Николче Ѓурѓиноски. По завршувањето на богослужбата и Опелото Христово, Митрополитот Тимотеј се обрати кон неизбројниот верен народ со пригодна беседа, која интегрално ви ја пренесуваме.

„Страшно беше да се види како Творецот на небото и на земјата на крст виси, сонцето помрачено, денот пак во ноќ претворен, и како земјата ги испраќа телата на мртвите од гробовите: со нив Ти се поклонуваме и ние, спаси нè“ (тропар на Деветти час на Велики Петок).

Оној Кој со светлина се облекува како со облека, денес Го завиткуваат во плаштаница, и со мириси прекриен, Го положуваат во нов гроб. Денес Христос слегува во адот, за и таму да им го проповеда спасението и да ги скрши оковите на смртта, нашиот последен непријател. Затоа ги величаме Твоите страдања и Твоето погребение Спасителу, Кој дојде да го спасиш светот.

На 14.04.2017 година, на Велики Петок наутро, во храмот „Успение на Пресвета Богородица - Каменско“ во Охрид, беа отслужени Царските часови и Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на свештениците Димче Азески, Горан Ставрески и Ѓорѓи Блажевски, протоѓаконот Николче Ѓурѓиноски и ѓаконот Сашо Целески. За време на Вечерната богослужба, беше изнесена светата плаштаница, на која верните се поклонуваат на положениот во гроб Христос. Христе Боже помилуј нè и удостој нè и за Твоето Воскресение, слава Ти!

„Беззакониците Го купија од ученикот Творецот на законот и, како престапник на законот, му го предадоа на суд на Пилата, викајќи: Распни Го, - оние на кои во пустината им даде маана. А ние, подражавајќи го праведниот разбојник, викаме: Спомни си и за нас, Спасителе, во Царството Твое“ (стихира на Блажени на Утрена на Велики Петок).

Денеска сето создание гледа треперејќи, зашто се распна Творецот на светот, Христос, Спасителот наш. Он, до крај понизен на Својот Отец, дозволи да Му судат беззаконици, да Го тепаат, да Му удираат шлаканици, да Го понизуваат, а на крај, дури и да Му ја изречат најсрамната смрт - распетието на крст. Затоа и земјата се затресе, и гробовите се отворија, и мртви воскреснуваа, не можејќи да ја истрпат неправдата, но и за да Го посведочат Неговото Божество. Затоа и нас, Христе, прости ни и дај ни да посведочиме заедно со оние кои Те чуваа: Навистина Овој бил Син Божји!

На овој ден, во светиот и Велик Четврток, во вечерните часови, во храмот „Св. вмч. Ѓорѓи“ во Струга, беше отслужена Утрена богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на свештениците Васко Голабоски и Петре Бојчиноски, протоѓаконот Николче Ѓурѓиноски и ѓаконот Христијан Костоски. На Утрената богослужба, беа прочитани и дванаесетте страдални Евангелија, во кои четворицата евангелисти ги опишуваат настаните од последните земни денови на нашиот Спасител, Неговите страдања и смртта на Крстот. Со Твоето натприродно и за нас неизмерно милосрдие, Христе Боже, помилуј нè. Амин!

„Вистинската Мудрост Божја, тајно водејќи ги пријателите свои, им подготвува душехранлива трпеза и за верните ја полни чашата на бесмртноста. Да пристапиме набожно и да повикаме: Христос, нашиот Бог, славно се прослави“ (песна од Канонот на Утрена на Велики Четврток).

На 13.04.2017 година, на Велики Четврток наутро, денот кога го прославуваме востановувањето на светата Тајна Евхаристија, во манастирот „Св. Климент и Пантелејмон“ на Плаошник во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоерејот Никола Христоски, свештеникот Љупчо Бакрачески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниците со пригодна беседа, која ви ја пренесуваме во целост.