НАЈНОВО ОД ДЕБАРСКО-КИЧЕВСКАТА ЕПАРХИЈА

„Распнат и погребан си бил, Христе, како што си благоволил! Си ја унштил смртта и си воскреснал во слава, како Бог и Владика, дарувајќи му на светот вечен живот и милост голема“ (хвалитна стихира на Утрена во Трета недела по Пасха - на жените мироносици).

На 22.04.2018 година, во Третата недела по Пасха - Неделата на жените мироносици, во храмот „Св. Никола“ во Перт, Западна Австралија, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески, протоерејот Станко Јовановски и протоѓаконот Николче Ѓурѓиноски. На Литургијата беше обнародена одлуката на Светиот архиерејски синод на Македонската православна црква - Охридска архиепископија, кој на предлог на надлежниот Митрополит Тимотеј, донесе Одлука за одликување на протоерејот Станко Јовановски во чин протоереј-ставрофор, односно го одликува со право на носење граден крст. Митрополитот Тимотеј го пофали протоерејот Станко за неговата успешна парохиска дејност, како и за придонесот за Македонската православна црква во Австралија, што всушност беше и мотив да го предложи протоерејот Станко за ова највисоко свештеничко одликување. По завршувањето на Литургијата, Митрополитот Тимотеј се обрати кон верниот народ со пригодна беседа, која интегрално ви ја пренесуваме.

„Сегашниов Празник е Пасха: Пасха тајна, Пасха божествена, Пасха спасителна, Пасха која во бесмртен живот нѐ преведува, Пасха која отклонува секаква тага од нашите срца, Пасха весела, која на учениците благодат им дава. Затоа Тома викаше: Ти си мојот Господ и Бог, Кој го заплени царството адово“ (стихира на Господи повикав... во Среда од Втора седмица на Пасха).   

На 18.04.2018 година, во Средата од втората седмица на Пасха и на празникот Упокоение на свети Методиј Солунски, во вечерните часови, во храмот „Св. Наум Охридски“ во Аделаид, беше отслужена Вечерна празнична богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески и протоѓаконот Николче Ѓурѓиноски. По завршувањето на Вечерната богослужба, беше прекршен празничниот колач, а Митрополитот Тимотеј се обрати кон верниците со пригодна беседа, која подолу во целост ви ја пренесуваме. Потоа Митрополитот Тимотеј, заедно со својата придружба, имаше средба со управата на овој наш македонски храм во Аделаид, на која беа разгледани повеќе прашања и проблеми околу функционирањето на храмот и црковната општина. Во продолжение ви ја пренесуваме беседата на Митрополитот Тимотеј.

На 16.04.2018 година, Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во придружба на протоереј-ставрофорите Ефтим Бетински и Димче Ѓорѓиески, свештеникот Климент Станковски и протоѓаконот Николче Ѓурѓиноски, го посети манастирот „Св. Климент Охридски“ во Кинглејк, Австралија. Митрополитот беше пречекан од игуменот на манастирот Гаврил и членовите на Управата на храмот „Св. вмч. Ѓорѓи и Прес. Богородица“ Епинг, Мелбурн, на чело со претседателот г-дин Мирчо Ангеловски, под чија управа се наоѓа и манастирот. Управата и игуменот Гаврил го информираа Митрополитот Тимотеј околу подготовките за преосветувањето на манастирот, а неизбежна беше констатацијата од страна на Митрополитот за заживувањето на манастирот и зголемената посетеност по ангажман на Управата, а особено по доаѓањето на игуменот Гаврил во овој наш свет манастир. Митрополитот го пофали нивниот труд и несебична ангажираност во афирмацијата на Македонската православна црква во Австралија и на македонскиот народ, со желби и молитви кон Воскреснатиот Спасител, Он да им дава уште многу крепост, здравје и сили, та уште повеќе да работат за доброто на Црквата, а за тоа да ја добијат наградата на верните и мудри градители.

„Христос му велеше на Тома: Допри Ме, бидејќи сакаш; стави ја раката и сфати дека имам коски и земно тело, и не биди неверен, туку заедно со другите увери се! А тој извика: Ти си мојот Бог и Господ! Слава на Твоето Воскресение!“ (хвалитна стихира на Утрена на Томина недела).

На 15.04.2018 година, во неделата по Велигден - Томина недела, во храмот „Пресвета Богородица“ во Мелбурн, Австралија, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Ефтим Бетински и Димче Ѓорѓиески, игуменот Гаврил и протоѓаконот Николче Ѓурѓиноски. По завршувањето на Литургијата, беше прекршен празничниот колач, а Митрополитот Тимотеј се обрати кон верниот народ со пригодна беседа, која интегрално ви ја пренесуваме.

На 11.04.2018 година, во храмот „Св. Петка“ во Рокдејл, Сиднеј, беше одржано епархиско собрание на Австралиско-сиднејската епархија, под претседателство на Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј. На собранието беа разгледани повеќе прашања и тековни активности на Епархијата за изминатата година, а свој извештај за работата на Епархијата имаше и Митрополитот Тимотеј. На собранието се разгледаа и Завршната сметка на Епархијата, а беше усвоен и предлог буџетот за оваа година. Свој извештај даде и Просветниот одбор на Австралиско-сиднејската епархија, а потоа беа разгледани и други прашања од значење за Епархијата и нејзините верници.