НАЈНОВО ОД ДЕБАРСКО-КИЧЕВСКАТА ЕПАРХИЈА

„Вратата адова си ја скршил, Господи, и со Твојата смрт си го разурнал царството на смртта, а родот човечки си го ослободил од распадливоста, и на светот си му дарувал живот и нетление, и милост голема“ (воскресна стихира на Утрена во Вторник од Светлата седмица).

На 30.04.2019 година, на третиот ден од празнувањето на Воскресението Христово, во храмот „Воскресение Христово“ во с. Могилец, Македонски Брод, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, свештениците Сашо Костадиноски, Боге Богески, Александар Матески и Зоран Ставрески и протоѓаконот Николче Ѓурѓиноски. По завршувањето на Литургијата, беше прекршен празничниот колач, а Митрополитот Тимотеј се обрати кон верниот народ со пригодно слово, во кое ја истакна спасителната улога на Воскреснатиот Христос. 

„Радувајте се, луѓе, и веселете се! Ангелот кој седеше на гробниот камен, тој ни благовести велејќи: Христос - Спасителот на светот - воскресна од мртвите, и со благопријатна миризба ја исполни вселената. Радувајте се, луѓе, и веселете се!“ (воскресна стихира на Утрена во Понеделник од Светла седмица).

На 29.04.2019 година, на Вториот ден Пасха, во храмот „Св. вмч. Ѓорѓи“ во Струга, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Никола Христоски, протоерејот Васко Голабоски, свештеникот Љупчо Бакрачески, протоѓаконот Николче Ѓурѓиноски и ѓаконот Христијан Костоски. По завршувањето на Литургијата, Митрополитот Тимотеј се обрати кон верниците со пригодна беседа, која интегрално ви ја пренесуваме. 

„Со архангелите да го воспееме Христовото Воскресение, зашто Он е Избавителот и Спасител на душите наши, и во страшна слава, и во крепка сила, пак доаѓа да му суди на светот што го создаде“ (стихира на Господи повикав... на Вечерна во Неделата на Пасха).

На 28.04.2019 година, денот на славното и свето Воскресение Христово - Пасха, во вечерните часови, според одамна востановената традиција, во катедралниот храм „Св. Софија“ беше отслужена свечена воскресенска Вечерна богослужба, на која беше прочитано и дел од Евангелието според Јован, во кое го слушнавме сведоштвото на апостолите за Христовото Воскресение. На Вечерната богослужба чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски, Сашо Богданоски, Димче Ѓорѓиески и Игор Никовски, свештениците Димче Азески, Горан Ставрески, Ѓорѓи Блажевски, Љупчо Бакрачески и Александар Димоски, протоѓаконот Николче Ѓурѓиноски и ѓаконот Христијан Костоски. По завршувањето на Вечерната богослужба, Митрополитот Тимотеј, на неизбројниот верен народ, му подели по едно велигденско јајце, и му го честита Торжеството над торжествата и Празникот над празниците, со древниот христијански поздрав: Христос воскресе! 

„Дојдете да вкусиме од новиот плод на лозјето - радоста божествена и, во овој ден на Воскресение, да се приопштиме кон Царството Христово, воспевајќи Го Него како Бог, во вековите“ (песна од канонот на Утрена на Пасха). 

Навистина неизмерно е свештена, сепразнична и спасителна оваа ноќ, која е предвесник на светлоносниот ден на Воскресението. Христос, нашата очистителна Пасха, воскресна од мртвите и ни засветли од гробот како прекрасно Сонце, од Кое сѐ добива живот. Великиот ден на Воскресението Христово го прославува сета Црква, и секое создание се радува на најважниот и најрадосниот чин на спасението на светот од канџите на смртта. И ние, чедата на древната Охридска архиепископија, во нашиот балкански Ерусалим - Охрид, торжествено и  исполнети со радост во срцата и душите, во сите храмови во Дебарско-кичевската епархија ја прославивме Пасхата - преминот од смртта кон животот. Централната прослава на Празникот над празниците беше во манастирот „Св. Климент и Пантелејмон“ на Плаошник во Охрид, каде по објавувањето на Христовото Воскресение, беше отслужена света архиерејска Златоустова Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештеникот Љупчо Бакрачески и протоѓаконот Николче Ѓурѓиноски. Пред почетокот на Литургијата, беше прочитано Велигденското послание, испратено од Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, заедно со членовите на Светиот архиерејски синод на МПЦ-ОА, кое подолу во целост ви го пренесуваме. На сите верници им го честитаме најрадосниот ден - Пасхата Христова, со древниот христијански поздрав: Христос Воскресе!  

„Дојдете да Го видиме нашиот Живот, Кој во гроб лежи, за да ги оживи оние кои лежат во гробовите. Дојдете денес да го видиме лавот од Јуда како спие, и пророчки да Му запееме: Кој ќе Те подигне, Цару, Кој лежиш и спиеш како лав? Но, воскресни самовласно, Господи, Кој Себе се даде за нас доброволно, слава Ти“ (хвалитна стихира на Утрена на Велика Сабота).

На 26.04.2019 година, на Велики Петок, во вечерните часови, кога го празнуваме боготелесното погребение и слегувањето во адот на Господа Бога и Спасителот наш Исус Христос, во храмот „Св. вмч. Ѓорѓи“ во Охрид, беше отслужена Утрена богослужба на којашто беа испеани и трите статии со кои го опеваме Христовото опело. На Утрената богослужба чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофорите Сашо Богданоски, Димче Ѓорѓиески и Игор Никовски и протоѓаконот Николче Ѓурѓиноски. По завршувањето на богослужбата, Митрополитот Тимотеј се обрати кон многубројниот верен народ со пригодна беседа, која ви ја пренесуваме во целост.