НАЈНОВО ОД ДЕБАРСКО-КИЧЕВСКАТА ЕПАРХИЈА

„Гледајќи ја добрината на твојата душа, Пречиста, некогаш Захариј со вера повика: Ти си нашето избавување, ти си радоста на сите, и наше обновување, зашто Оној, Когошто не може да Го смести ни вселената, мене ми се покажува сместен во тебе“ (песна од канонот на Утрена на празникот Воведение во храмот на Пресвета Богородица - Пречиста). 

На 04.12.2019 година, денот кога го прославуваме празникот Воведение во храмот на Пресветата Владичица наша Богородица - Пречиста, во храмот „Успение на Пресвета Богородица“ - Каменско во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештениците Димче Азески, Горан Ставрески, Ѓорѓи Блажевски и Љупчо Бакрачески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме. 

„Архистратизи Божји, служители на божествената слава, на ангелите началници, и на луѓето наставници, просете го за нас она што е полезно, и милост голема, како бесплотни архистратизи“ (кондак на Утрена на Собор на св. Архистратиг Михаил и на другите бесплотни сили).

И оваа година, споменот на св. Архангел Михаил и на другите бесплотни сили беше свечено одбележан во манастирот на Белото Езеро, којшто преподобниот Наум Охридскиот Чудотворец го посвети токму на ангелските сили. Празникот започна ден порано, на 20.11.2019 година, со празнична Вечерна богослужба, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, протоерејот-ставрофор Никола Христоски и протоѓаконот Николче Ѓурѓиноски. Прославата на споменот на светиот Архангел Михаил и на другите бесплотни сили продолжи утредента, на 21.11.2019 година, со света архиерејска Литургија, на којашто чиноначалствуваше Митрополитот Тимотеј, во сослужение на архимандритот Нектариј, протоерејот-ставрофор Никола Христоски и протоѓаконот Николче Ѓурѓиноски. По завршувањето на Литургијата, беше прекршен празничниот колач, а потоа Митрополитот Тимотеј се обрати кон верниот народ со пригодна беседа, која ви ја пренесуваме во целост. 

„Вие, бесребреници, се просветливте како добросјајно злато, со божествената благодат на исцеленија збогативте мнозина. Затоа имајте милост кон нас, кои сме бранувани од лути напади на искушенија“ (песна од канонот на Утрена на свети бесребреници и чудотворци Козма и Дамјан).

На 14.11.2019 година, на денот на светите бесребреници и чудотворци Козма и Дамјан, во храмот „Св. Козма и Дамјан“ („Св. Врачи“) во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, протоерејот Љупчо Симиџиески, свештениците Горан Ставрески и Љупчо Бакрачески и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, која интегрално ви ја пренесуваме. 

„Светлата проповед за Воскресението, кога од ангелот ја дознаа Господовите ученички, и прадедовската осуда ја отфрлија, фалејќи се, на апостолите им говореа: Се уништи смртта, воскресна Христос Бог, Кој на светот му дарува милост голема“ (воскресен тропар глас 4-ти).

На 10.11.2019 година, во Дваесет и првата недела по Педесетница и на празникот на св. мч-чка Параскева Икониска и св. Димитриј Ростовски, во манастирот „Пресвета Богородица - Пречиста“ во Кичево, беше отслужена света архиерејска заупокоена Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот Стевче Тошевски, еромонахот Доситеј, свештеникот Александар Матески и протоѓаконот Николче Ѓурѓиноски. По завршувањето на Литургијата, беше извршен Парастос по повод тригодишнината од упокојувањето на игуманијата Агнија, која долги години раководеше и се грижеше за ова наше светилиште. Потоа свештенството и верниот народ се упатија кон вечното почивалиште на игуманијата Агнија, каде што беше извршена трисагија за покој на душата на упокоената игуманија. Митрополитот Тимотеј се обрати кон верниците со пригодна беседа, која ви ја пренесуваме во целост.

„Твојот спомен, славен маченику Димитрие, денес ја осветли Црквата Христова, и сите нѐ собра со песни достојно да те восфалиме, богомудри, како вистински воин и уништувач на вразите. Затоа, со твоите молитви, избави нѐ од искушенија“ (седален на Утрена на св. вмч. Димитриј).

На 08.11.2019 година, кога го прославуваме споменот на св. вмч. Димитриј Солунски, во храмот „Св. вмч. Ѓорѓи“ во Струга, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот Васко Голабоски, свештениците Љупчо Бакрачески и Христијан Костоски и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниот народ со пригодна беседа, која интегрално ви ја пренесуваме.