НАЈНОВО ОД ДЕБАРСКО-КИЧЕВСКАТА ЕПАРХИЈА

„Дојдете, верни, заедно да ѝ запееме песна на страдалницата Параскева, бидејќи таа во светот сјае со чудеса, прогонувајќи го мракот на прелеста, и благодат неисцрпна им дава на верните, кои викаат: Радувај се, маченице многустрадална“ (кондак на Утрена на св. преподобномаченица Параскева).

На 08.08.2021 година, денот кога го прославуваме споменот на светата преподобномаченица Параскева - Петка и на св. свешт-мч. Ермолај, во параклисот „Св. Петка“ во ман. „Св. Наум Охридски“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, протоерејот-ставрофор Никола Христоски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, којашто ви ја пренесуваме во целост.

„Пророче и предвидувачу на великите дела на нашиот Бог, Илија со големо име, кој со твојот збор ги задржа водоносните облаци, моли Го за нас единствениот Човекољубец“ (кондак на Утрена на св. пророк Илија).

Празникот на великиот пророк Илија и на светите Пречистански преподобномаченици Евнувиј, Пајсиј и Аверкиј и оваа година торжествено беше прославен во манастирот „Пресвета Богородица - Пречиста“ во Кичево. Празнувањето започна на 01.08.2021 година, со Празнична вечерна богослужба, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, еромонахот Макариј, свештеникот Александар Матески и протоѓаконот Николче Ѓурѓиноски. По завршувањето на Вечерната богослужба, беше извршен Парастос за сите порано упокоени браќа и сестри, кои ги дале своите животи за Црквата и Татковината во сите буни, војни и востанија.

На 29.07.2021 година, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот „Св. Наум Охридски“ во Охрид, протоерејот-ставрофор Никола Христоски и протоѓаконот Николче Ѓурѓиноски, изврши осветување на новите камбани во манастирот „Св. Наум Охридски“ во Охрид. Произведувајќи прекрасна милозвучна мелодија, новите четири камбани одлично го пополнија познатиот Светинаумски амбиент. Камбаните половично се донација од фирмата Котур инжењеринг од Охрид. Господ нашиот Бог да им подари благодат на новите камбани, а нивното ѕвонење да ги поттикнува сите верни на прославување на Неговото свето Име.

На 22.07.2021 година, се упокои во Господа архимандритот Методиј (Петров), долгогодишен служител и подвижник во Валаамскиот манастир во Русија. Архимандритот Методиј е Македонец, кој својот монашки пат го запоочнува во манастирот „Св. Наум Охридски“ во Охрид, а преку Света Гора заминува во Русија. Во Русија најпрво се подвизува во Троицко-Сергиевата Лавра, за потоа заедно со Епископот Панкратиј да заминат во манастирот Валаам, каде што отец Методиј служеше повеќе од 25 години. Архимандритот Методиј е познат како човек со големо срце, човек кој беше пријател и со најмалите, но и со највлијателните. Тој е човек, чија животна девиза беше: Човек е многу среќен ако може да исполни нечија прозба“. Со иста таква љубов, отец Методиј беше и наш пријател, личен пријател на нашиот Митрополит и на сите нас. По повод неговото упокојување, Неговото Високопреосвештенство Митрополитот Плаошко-струшки и Дебарско-кичевски и Администратор Австралискос-сиднејски г. Тимотеј, во сослужение на протоерејот-ставрофор Никола Христоски и протоѓаконот Николче Ѓурѓиноски, во храмот „Пресвета Богородица Перивлепта“ во Охрид, отслужи краток помен за прошка на гревовите на упопкоениот Архимандрит Методиј и ја помоли Божјата Мајка таа да биде негова застапничка пред Престолот на Севишниот Бог. Бог да му ги прости сите волни и неволни согрешенија и да ја насели неговата душа во живеалиштето на праведниците. 

„Откако примивте благодат на исцеленија, им давате здравје на оние кои се во неволји, лекари и преславни чудотворци; но со вашата посета ја поразивте и дрскоста на воинствениците, исцелувајќи го светот со чудеса“ (кондак на утрена на свети бесребреници и чудотворци Козма и Дамјан).

На 14.07.2021 година, на празникот на светите бесребреници и чудотворци Козма и Дамјан, во храмот „Св. Козма и Дамјан“ („Св. Врачи“) во Пештани, Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Ристе Ристевски, свештениците Атанас Казанџиски, Димче Азески и Александар Димоски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, којашто интегрално ви ја пренесуваме.