НАЈНОВО ОД ДЕБАРСКО-КИЧЕВСКАТА ЕПАРХИЈА

„Благи Боже, Кој со Својата светлина ја освети сета вселена, се преобрази на Гора висока, откривајќи им ја на Твоите ученици силата Твоја, бидејќи светот го избави од престапот. Затоа Ти викаме: Милосрден Господи, спаси ги душите наши“ (Литиска стихира на Вечерна на Свето Преображение на Господ Исус Христос).

На 19.08.2018 година, денот кога го прославуваме празникот Свето Преображение на Господ Бог и Спасител наш Исус Христос, во храмот „Св. вмч. Ѓорѓи“ во Струга, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Никола Христоски, протоерејот Васко Голабоски, свештениците Александар Димоски и Сашо Целески, протоѓаконот Николче Ѓурѓиноски и ѓаконот Христијан Костоски. По завршувањето на Литургијата, според вековната црковна традиција, беше осветен новиот лозов плод, од кој ќе биде произведено новото вино, а кое, на чудесен начин, како и самиот настан на светото Преображение, на светата Литургија ќе стане света Крв Христова. На самиот крај, Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме. 

„Откако си приникнал во бездната на Божјата Премудрост, оттаму си го нацрпил богатството на божествените писанија, со кое, Клименте семудри, елинскиот глас си го појаснил со македонскиот јазик. Затоа со љубов те славиме“ (стихира по Евангелие на Утрена на св. Климент Охридски).

Торжествувањето на великиот проповедник, наследникот на апостолите, кој го упати нашиот народ во Божјата вистина и го направи избран народ, светиот Климент Охридскиот Чудотворец, како и на светиот великомаченик и целител Пантелејмон и на светите Седмочисленици, започна на 08 август, со Празнична вечерна богослужба, во манастирот „Св. Климент и Пантелејмон“ на Плаошник во Охрид, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Никола Христоски и Димче Ѓорѓиески, свештениците Кирил Јованоски, Горан Ставрески, Александар Димоски и Сашо Целески и протоѓаконот Николче Ѓурѓиноски. По завршувањето на Вечерната богослужба, Митрополитот Тимотеј се обрати кон неизбројниот верен народ со пригодна беседа, која подолу во целост ви ја пренесуваме. Во подоцнежните часови, пред моштите на Охридскиот светител, беше отслужен и Акатист на свети Климент Охридски.

„Остварувајќи ја твојата желба, Параскево, од небото го слушна гласот на Бога. Тогаш ревносно ја водеше твојата трка, света маченице и, кога ти беше отсечена твојата скапоцена глава, ти потрча кон Христа и прими многуценето достоинство“ (песна од канонот на Утрена на преподобномаченица Параскева).

На 08.08.2018 година, денот кога го прославуваме споменот на светата преподобномаченица Параскева и на светиот свештеномаченик Ермолај, во храмот „Св. Петка“ во манастирот „Св. Наум Охридски“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, протоереј-ставрофор Димче Ѓорѓиески и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, која ви ја пренесуваме во целост. 

„Ние те познавме како ангел на земјата, божествени пророче, и како човек Божји на небесата, како што и Самиот Господ рече: Бидејќи си жесток човек, Илија, и не можеш да го трпиш Израилот кој греши, качи се ти при Мене, а Јас ќе слезам долу“ (песна од канонот на Утрена на св. пророк Илија).

Централната прослава во нашата Епархија, на големиот православен и национален македонски празник св. пророк Илија - Илинден, како и празнувањето на светите пречистански преподобномаченици Евнувиј, Пајсиј и Аверкиј, и оваа година се одржа во манастирот „Пресвета Богородица - Пречиста“ во Кичево. Празнувањата започнаа ден порано, на 01 август, со Празнична вечерна богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Никола Христоски, еромонахот Ефросиниј, свештеникот Александар Матески и ѓаконот Христијан Костоски.

На 29.07.2018 година, во Деветтата недела по Педесетница и на празникот на светиот свештеномаченик Атиноген и на светата маченичка Јулија, Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на Неговото Високопреосвештенство Митрополитот Европски г. Пимен, протоерејот-ставрофор Никола Христоски и свештеникот Сашо Ристески, изврши осветување и го постави камен темелникот за нов храм, посветен на празникот Воведение на Пресвета Богородица во населбата Рача во Охрид. Храмот ќе се гради по иницијатива на иницијативниот одбор, чии членови се: Кристијан Трифуноски, Стојан Џајкоски и Дејан Блажески, на чело со парохискиот свештеник Сашо Ристески. Храмот ќе се гради со донациите на локалното население, како и донациите од верниците од пошироката околина и сите добронамерни луѓе. По завршувањето на чинот на осветување, Митрополитот Тимотеј се обрати кон многубројниот верен народ со пригодно слово, во кое најпрво му го честита денешниот голем чин, а потоа и го поучи, кажувајќи му дека убаво е да се градат храмови, но она што е најважно е одењето по вистинскиот пат во животот, кој е тесен и тежок, но истовремено и единствениот којшто дава плодови на спасение.