НАЈНОВО ОД ДЕБАРСКО-КИЧЕВСКАТА ЕПАРХИЈА

„Откако ја исполни промислата за наша полза, и земното го соедини со небесното, се вознесе во слава, Христе Боже наш, без да се разделиш од нас, но останувајќи секогаш со нас, и викајќи им на оние што Те љубат: Јас сум (секогаш) со вас, и никој ништо против вас не може“ (кондак на Утрена на Вознесение Христово - Спасовден).

На 06.06.2019 година, во четириесеттиот ден по Господовата Пасха, кога го празнуваме сесветлото Вознесение Христово, во манастирот „Вознесение Христово“ („Св. Спас“) во с. Г. Лакочереј, Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски и Димче Ѓорѓиески, протоерејот Кирил Јованоски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон многубројниот верен народ со пригодна беседа, која подолу во целост ви ја пренесуваме. На самиот крај, беше извршена и празнична литија околу светиот храм, а потоа литијата продолжи и до местото каде што е поставен големиот Крст во селото, како благодарност кон Господа за сите направени добрини. Во продолжение ви ја пренесуваме беседата на Митрополитот Тимотеј.

„Ти му ги отвори очите на оној што не ја видел сетилната светлина, и му ги просветли очите на душата, и, откако Те позна како негов Творец, направи да Те слави како Бог, Кој се јави како човек од милосрдие“ (песна од канонот на Утрена во Шестата недела по Пасха - на Слепиот).

На 02.06.2019 година, во Шестата недела по Пасха - на Слепиот, и на празникот на св. маченици Талалеј, Александар и Астериј, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски, во сослужение на протоерејот-ставрофор Никола Христоски, свештеникот Александар Димоски и протоѓаконот Николче Ѓурѓиноски, изврши осветување на новиот храм „Св. Архангел Михаил“ во с. Ботун, општина Дебарца, Охрид. Откако беше осветен храмот, веднаш беше отслужена и првата света архиерејска Литургија во овов нов Божји дом. По завршувањето на Литургијата, Митрополитот Тимотеј се обрати кон верниците со пригодна беседа, која интегрално ви ја пренесуваме.

„Отци, за восхит достојни, вие нѐ збогативте со духовна ризница, бидејќи од вас започна Божествената литургија да се служи на јазикот словенски. И ние, како заедничари на таа благодат до денеска, ве славиме пеејќи: Сите дела Господови, благословете Го Господа“ (песна од канонот на утрена на свети Кирил и Методиј).

На 24.05.2019 година, денот кога ги прославуваме македонските и сесловенските просветители, светите солунски браќа Кирил и Методиј, во базиликата „Св. Климент Римски“ во Рим, Италија, каде што почива светиот Кирил, беше отслужен молебен на гробот на светителот. На молебенот чиноначалствуваше Неговото Блаженство Митрополитот Скопски и Архиепископ Охридски и Македонски и на Јустинијана Прима г. г. Стефан, во сослужение на Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, Неговото Преосвештенство Епископот Хераклејски г. Климент, протоерејот-ставрофор Никола Христоски, игуменот Агатон, протоерејот Стевче Беќарски, протоѓаконите Николче Ѓурѓиноски и Ванчо Умленски и ѓаконот Александар Димитријов. На молебенот присуствуваше и државната делегација на Р. Македонија, предводена од претседателот на Собранието на РМ, г-дин Талат Џафери, а присуствуваа и вицепремиерот Кочо Анѓушев, директорот на Комисијата за односи со верските заедници и религиозни групи, м-р Даријан Сотировски, заменик министерот за култура на Рм, г-дин Владимир Лазовски, како и други претставници на Собранието. Молебенот беше збогатен од прекрасните гласови на хорот при соборниот храм „Св. Климент Охридски“ од Скопје. По завршувањето на молебенот, Архиепископот Стефан се обрати кон присутните верници со пригодна беседа. 

„Атанасие, славен украсу на светителите, столбу на Светлината и тврдино на Црквата, бранителу на (Света) Троица, златна трубо на богословието, познат законописателу на монашко житие, со нас празнуваш, свештениците усовршувајќи ги и верните луѓе приведувајќи ги кон Христа во вековите“ (песна од канонот на Утрена на пренос на моштите на св. Атанасиј Велики).

На 15.05.2019 година, на празникот Пренос на моштите на св. Атанасијн Велики, во ман. „Св. Атанасиј Велики“ (ман. „Св. Наум Охридски“) во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Никола Христоски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодно слово, во кое се задржа на животот и делата на светиот Атанасиј, како и неговото значење во одбраната на вистината.

„Разгорен од ревносна љубов кон Господа, ти храбро ги уништи ризниците на прелеста и, откако на судот Го исповеда Христа, преславен маченику, победоносецу себлажен Георгие, моли Го Христа, да ни дарува милост голема“ (седален на Утрена на св. вмч. Георгиј).

Малку се зборови, малку се прослави, малку се и служењата за достојно да се прослави великомаченичкиот и натчовечки подвиг на светиот победоносец Георгиј, кој не жалејќи се себеси и своето тело, најдостојно ја посведочи силата на Христовото Воскресение. Но, сепак, не може, а да не ги спомнеме и пофалиме службите и пофалбите што градот Струга, чиј централен храм го носи името на овој Маченик Христов, му ги оддава на светиот Георгиј. Долгите години традиција, несебичните залагања на монаштвото од Бигорскиот манастир, манастирот „Св. вмч. Георгиј“ во Рајчица и Пречистанскиот манастир, секојдневното жртвување на протоерејот Васко Голабоски, старешина на храмот „Св. вмч. Георгиј“ во Струга, а сето тоа со активното учество, и пред сѐ, со благословот и по молитвите на нашиот Архиереј, Високопреосвештениот Митрополит Плаошко-струшки и Дебарско-кичевски и Администратор Австралиско-сиднејски г. Тимотеј, ја направија Струшката Еордија (Литија) вистинско сведоштво за силата на православието, зрак на радост од светлината на Христовото Воскресение.