НАЈНОВО ОД ДЕБАРСКО-КИЧЕВСКАТА ЕПАРХИЈА

„О севоспеана Мајко, која Го роди Словото - посвето од сите светии, откако ќе го примиш овој наш сегашен принос, избави ги од сите напасти и ослободи ги од идните маки, оние што ти пеат: Алилуја!“ (кондак 13 од Акатистот на Пресвета Богородица).

На 27.03.2015 година, во Петокот од петтата седмица на Великиот пост, во храмот „Успение на Пресвета Богородица - Каменско“ во Охрид, беше отслужен последниот на Пресвета Богородица во овогодинешната света Четириесетница, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на свештениците Никола Христоски, Димче Азески, Горан Ставрески и Ѓорѓи Блажевски. Многуброен верен народ дојде да се помоли и да ја побара заштитата од нашата света Мајка и постојана застапничка пред Престолот на Севишниот Бог. По завршувањето на Акатистот, свештеникот горан Ставрески се обрати кон верниот народ со кратко поучно слово.

„Христе Боже, Кој на крстот се прикова со разбојници и со Твојата рана природата човечка ја исцли, не презирај ме мене, кој паднав во рацете на духовни друмски разбојници, и кој сум соблечен од нив од добродетели и сум тешко ранет. Ниту еден од преподобните не можеше да ме исцели, зашто сум полу мртов. Бидејќи остатокот од животот ми е многу краток, надеж имам само во Тебе, Кој им даваш живот на мртвите. Но, раните превиткај ми ги со Твојата добрина, единствен Човекољупче“ (стихира на стиховни на Утрена во Петок од петтата седмица од Великиот пост).

На 27.03.2015 година, во Петокот од петтата седмица од Великиот пост и на празникот на преподобниот Бенедикт Нурсиски, како и по повод именденот на монахот Бенедикт, старешина на манастирот „Пресвета Богородица“ во с. Г. Манастирец, Македонски Брод, беше отслужена света архиерејска Литургија на претходноосветени дарови, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на свештеникот Никола Христоски и еромонахот Ефросиниј. По завршувањето на Литургијата, беше прекршен празничниот колач, а Митрополитот Тимотеј се обрати кон верниот народ со пригодна беседа, која во целост ви ја пренесуваме.

„Од насладите на овој свет, како штетни, си се отстранил и, откако со постот телото си го ослабил, крепкоста на душата си ја обновил, преподобен, и со слава небесна си се збогатил, преславен. Затоа не престанувај да се молиш за нас (оче) Јоване“ (егзапостилар на Утрена на преподобен Јован Лествичник).

На 22.03.2015 година, во Четвртата недела од Великиот пост, посветена на преподобниот Јован Лествичник, како и на празникот на светите 40 маченици во Севастија - Младенци и преподобните 40 Битолски новомаченици, во храмот „Св. Петар и Павле“ во Кичево, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандрит Нектариј, протоереј Стевчо Тошевски, свештениците Ристо Камбуроски и Александар Матески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниот народ со пригодна беседа, која интегрално ви ја пренесуваме.

„Пристапете и од неисцрпните води налејте, што благодатта на крстот ги излева, гледајќи го пред нас ова свето дрво, даруваниот извор, напоено со крвта и водата на Господарот на сè, Кој на него доброволно се вознесе, и земните ги воздигна“ (хвалитна стихира на Утрена на Крстопоклона недела).

На 15.03.3015 година, во Третата недела од Великиот пост или Крстопоклона недела, во храмот „Св. вмч. Ѓорѓи“ во Струга, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандрит Нектариј, протоереј-ставрофор Илија Танаскоски, протоереј Темелко Донески, свештениците Никола Христоски и Васко Голабоски, протоѓаконот Николче Ѓурѓиноски и ѓаконот Димитрија Павлески. Пред почетокот на Литургијата, според типикот на православната Црква, насреде храмот беше изнесен светиот Крст, кој по Христа, од орудие на срамот стана оружје на христијаните и знак на победа, со кој се победува секој демонски напад. Според традицијата, сите верници пристапија да го целиваат светиот Крст, а Митрополитот Тимотеј им подели гранчиња босилек.

Денешната Литургија беше местото за уште една радост за христијаните од нашата епархија и црква. Имено, ѓаконот Димитрија Павлески, од рацете на нашиот надлежен Митрополит Тимотеј, го прими свештеничкиот чин, и се придодаде на работниците на духовната почва Господова, на која многумина треба да растат по мерата Христова. Од името на свештенството и од сите верници од нашата епархија, како и од Митрополитот Тимотеј, му го честитаме свештеничкиот чин на отец Димитрија, со молитва да г зачува со „бел образ“.

По завршувањето на Литургијата, новиот свештеник им подели нафора на верниците, а Митрополитот Тимотеј се обрати со пригодна беседа, која интегрално ви ја пренесуваме.

„Огледало Божјо си бил, Григорие, оти она што е по образ Божји си го сочувал, откако умот за господар на телесните страсти си го поставил, а и она што е по подобие си го примил. Поради тоа си бил и дом на Света Троица“ (песна од канонот на Втора недела од Великиот пост).

Светата православна Црква ги посветила сите недели од Великиот пост на некој голем настан, кој бил од големо значење за верниците, или, пак, на некој од големите богослови и подвижници, кои се покажале вистински Божји луѓе и служители на божествените тајни. Оваа Втора недела од Великиот пост му е посветена на великиот богослов свети Григориј Палама, кој ја победи Варлаамовата гордост, побивајќи го неговото погрешно учење.

Во оваа Втора недела од Великиот пост, на 08.03.2015 година, во капелата посветена на светиот Григориј Палама, во манастирот „Св. вмч. Георгиј“ во Рајчица, Дебар, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, свештеникот Никола Христоски, еромонасите Доситеј, Макариј, Еразмо и Ефросиниј, протоѓаконот Николче Ѓурѓиноски и ероѓаконите Порфириј и Силуан. По завршувањето на Литургијата, беше осветено коливото, а Митрополитот Тимотеј се обрати кон верните со пригодна беседа, која во целост ви ја пренесуваме.