НАЈНОВО ОД ДЕБАРСКО-КИЧЕВСКАТА ЕПАРХИЈА

„Јагнето што го навести пророк Исаија, оди на доброволно колење, и дозволува да биде биено по плеќите и образите; без да го свртува лицето од плуканиците, на срамна смрт се осудува: и Он, безгрешниот, добороволно прима сè, за да им дарува на сите воскресение од мртвите“ (стихира на Господи повикав... на Вечерна од Велики Четврток). 

Во овој велик ден празнуваме и си спомнуваме за повеќе настани, но настанот кој особено се истакнува, секако, е Тајната Вечера, на која нашиот Спасител Христос, ја востанововува Евхаристијата, преку која и ние стануваме едно еден со друг, но и со Самиот Христос. Евхаристијата е врв на Христовата љубов, бидејќи Он не само еднаш и само тогаш, туку постојано и секојдневно се принесува за нас грешните. А Он, токму таква заповед ни даде: да се љубиме еден со друг, а ако се љубиме, по тоа ќе нè познаат дека сме Негови. 

На 09.04.2015 година, на Светиот и Велик Четврток утрото, во храмот „Пресвета Богородица Перивлепта“ во Охрид, беше отслужена света архиерејска Василиева Литургија, на која чиноначлствуваше Неговото Високопреосвештенство Митрополитот Дебарско-кичевски г. Тимотеј, во сослужение на свештениците Никола Христоски, Љупчо Симиџиески, Владо Недески и Љупчо Бакрачески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верните со пригодно слово, во кое се задржа на Евхаристијата и нејзиното животно и неопходно значење за човековиот род и за секој човек посебно, а потоа и им подели нафора на верниците.

„Онаа што поради нејзиниот живот беше отфрлена и која поради покајанието беше примена, носејќи миро, Ти пристапи викајќи: Ти, Кој се роди од Дева, не отфрлај ме мене блудната. Не презирај ги моите солзи, Ти, Кој си радост на ангелите. Но, прми ме, мене којашто се каам, грешницата што не си ја отфрлил, Господи, поради Твојата милост голема“ (стихира на Господи повикав... на Вечерна во Светата и велика Среда). 

На 08.04.2015 година, во Светата и велика Среда, во храмот „Пресвета Богородица - Каменско“ во Охрид, беше отслужена света архиерејска Литургија на претходноосветените дарови, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј Димче Ѓорѓиески, свештениците Никола Христоски, Димче Азески и Љупчо Бакрачески, протоѓаконот Николче Ѓурѓиноски и ѓаконот Сашо Целески. По завршувањето на Литургијата, Митрополитот Тимотеј се обрати кон верните со пригодно слово. 

„Богородица слушна јазик што не го знаеше, кога Архангелот ѝ ги пренесе зборовите на радосната вест. Затоа таа со вера го прими поздравот и Те зачна Тебе, предвечниот Бог. Поради тоа и ние, радувајќи се, Ти викаме: Боже, Кој се воплоти од неа неизменливо, мир на светот дарувај му, а на душите наши - милост голема“ (стихира на Господи повикав... на Вечерна на Благовештение).

Великиот Архангел Гавриил денеска ја објавува најрадосната вест за човечкиот род - Оној Кој е предвечен, денес неизменливо се воплотува од Пречистата, за да го спаси човекот од оковите на смртта. Денес Светиот Дух ја осени Дева, која од името на сиот човечки род се принесува како жртва и зема учество во домостројот на спсението. Затоа и ние радосно пееме: Радувај се, Благодатна, Господ е со тебе, Кој има голема милост. 

На овој за сите нас радосен ден, на 07.04.2015 година, во катедралниот храм „Св. Софија“ во Охрид, беше отслужена света архиерејска Златоустова Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофор Сашо Богданоски, протоереј Димче Ѓорѓиески, свештениците Никола Христоски, Димче Азески, Владо Недески, Љупчо Бакрачески, Роберт Илијевски и Миле Алексоски, протоѓаконот Николче Ѓурѓиноски и ѓаконот Сашо Целески. По завршувањето на Литургијата, Митрополитот Тимотеј се обрати кон своето верно стадо со пригодна беседа, која интегрално ви ја пренесуваме.

„Сионе, Царот Твој Христос влегува во тебе, седнат на младо осле, за да ја разруши безумната измама идолска и да ги запре невоздржаните стремежи на сите народи, за да пеат: Сите дела (Господови), пејте Му на Господа“ (песна од Канонот на Утрена на Цветници).

Денеска Логосот Божји, седнат на бесловесно осле, доаѓа да ги ослободи луѓето од бесловесноста. Откако го воскресна четиридневниот Лазар од мртвите, доаѓа во Ерусалим на добороволно страдање, а дечињата го поздравуваа, викајќи: Осана на Синот Давидов; благословен е Кој доаѓа во името Господово, Царот Израилев. На тој начин, овие најмали, но и најчисти души, ја најавуваа Христовата победа над смртта. 

На 05.04.2015 година, на празникот Цветници, во манастирот „Пресвета Богородица - Пречиста“ во Кичево, беше отслужена света архиерејска Златоустова Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерејот Стевчо Тошевски, свештениците Никола Христоски, Владо Недески и Александар Матески и протоѓаконот Николче Ѓурѓиноски. Пред почетокот на Литургијата, беа осветени врбовите гранчиња, во спомен на гранчињата со кои малите деца Израилеви го пречекаа Спасителот на светот. По завршувањето на Литургијата, Митрополитот Тимотеј им подели нафора на многубројните верници, а потоа се обрати кон нив со пригодна беседа, која во целост ви ја пренесуваме. 

„Агницата Христова и ќерка, со песни да ја прославиме сега, Марија вечно споменуваната, која се покажа како египетска овца, и сета нивна прелест ја избегна, и како единствен совршен цвет на Црквата се принесе, со воздржување и молитва над мерата на човечката природа. Затоа единствениот Седржител ги возвиси и животот и делата на Марија преславната“ (икос на Утрена на Петта недела од Великиот пост).

На 29.03.2015 година, во Петтата недела од Великиот пост, посветена на преподобната Марија Египетска, во храмот „Св. Никола Геракомија“ во Охрид, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, свештениците Никола Христоски, Љупчо Симиџиески, Владо Недески и Љупчо Бакрачески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верните со пригодна беседа, која интегрално ви ја пренесуваме.