НАЈНОВО ОД ДЕБАРСКО-КИЧЕВСКАТА ЕПАРХИЈА

„Вие, кои на земјата и ги оставате земните грижи, на правта и ги отстапувате калта и отпадот, ајде да се отрезниме, ние смртните, очите и мислите да ги издигнеме во висините, погледот и чувствата да ги впериме кон небесните врати, да си замислиме дека сме на Маслиновата Гора, и да Го созерцаваме Избавителот, носен на облаците, зашто оттаму Господ се вознесе на небесата, и таму ги раздели изобилните дарови на Своите апостоли, откако ги утеши како татко, и ги утврди, и ги поучи како синови, и им рече: Не се разделувам од вас; Јас сум со вас, и никој ништо не ви може“ (икос на празникот Вознесение Христово).

Во четириесеттиот ден по Воскресението Христово, нашиот Спасител се вознесе на небесата, но и им Го навести Утешителот - Светиот Дух на апостолите, велејќи им: Добро е Јас да заминам, оти, ако Јас не си заминам, Утешителот нема да дојде. Откако Воскреснатиот Христос им се јавувал на учениците во текот на четириесетте дена, поучувајќи ги и извршувајќи многубројни чудеса, Он се воздигнал на небесата и седнал од десната страна на Отецот. Всушност, Господ Исус Христос ја воздигнува човековата природа на небесата, со што и се разрушува древната клетва, а човекот го добива најголемото достоинство - достоинство за кое се вели дека и око не виде и уво нема слушнато. Затоа и верниот народ толку радосно и торжествено го прославува овој празник, знаејќи и исповедајќи дека Христос се вознесе, но и дека Сесветиот Дух нема да задоцни и ќе дојде.

Прославата на овој величествен празник започна ден порано (20.05.2015) со свечена Вечерна богослужба во манастирот „Вознесение Христово“ („Св. Спас“) во с. Г. Лакочереј, Охрид, на која чиноначалствуваше Неговото Високопресвештенство Митрополитот Дебарско-кичевски г. Тимотеј, во сослужение на протоереј Димче Ѓорѓиески, свештениците Никола Христоски, Владо Недески и Љупчо Бакрачески, протоѓаконот Николче Ѓурѓиноски и ѓаконот Сашо Целески. Празнувањето продолжи утредента, најпрво со преосветувањето на светиот престол, во реновираната манастирска црква, а потоа и со света архиерејска Литургија, на која чиноначалствуваше Митрополитот Тимотеј, во сослужение на архимандрит Нектариј, протоереј Димче Ѓорѓиески, свештениците Никола Христоски, Кирил Јованоски, Владо Недески и Љупчо Бакрачески, протоѓаконот Николче Ѓурѓиноски и ѓаконот Сашо Целески. По завршувањето на Литургијата беше извршен чинот на Мал водосвет и беше прекршен празничниот колач, а се изврши и литија околу храмот. 

На 16.05.2015 година, на празникот на светите маченици Тимотеј и Мавра, во манастирот „Рождество на Пресвета Богородица“ во с. Г. Манастирец, Македонски Брод, беше отслужена света архиерејска Литургија, на која чиноначалствуваше Неговото Високопресвештенство Митрополитот Дебарско-кичевски г. Тимотеј, во сослужение на свештеникот Никола Христоски, еромонахот Ефросиниј и протоѓаконот Николче Ѓурѓиноски. По завршувањето на Литургијата, беше осветен новиот конак во манастирот. Митрополитот му честита на монахот Бенедикт за неговиот труд во возобновувањето на ова наше светилиште и му посака и понатамошни успеси за афирмација на манастирот и на Македонската православна црква, а неговите заложби да бидат за спасение на неговата душа.

Нашиот верен народ отсекогаш имал голема почит кон светите маченици, кои ги посрамиле своите мачители и се закитиле со рајски венец. Меѓу неизбројното мноштво маченици во диптихот на светиите, кај нашиот народ особено се истакнува великиот маченик Георгиј, кој е славен и почитуван во многу домови, а и народот му посветил многу цркви и манастири, каде ќе може да ги принесува своите молитви кон него. Овој свет великомаченик се јавува и како заштитник на градот Струга, чиј централен храм и го носи неговото име. Затоа и прославувањето на свети Георгиј во градот Струга е толку свечено и торжествено.

Откако го прославивме споменот на свети Георгиј ден претходно, според одамна воспоставената традиција во Струга, празнувањето продолжи и наредниот ден на 07.05.2015 година. Прославата започна во утринските часови, кога во храмот „Св. вмч. Георгиј“, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофор Илија Танаскоски, свештениците Никола Христоски, Петре Бојчиноски, Васко Голабоски, Љупчо Бакрачески и Димитрија Павлески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верните со пригодно слово, во кое повика на подвиг и исполнување на Божјите заповеди, за да можеме да го поминеме нашиот живот плодотворно, онака како што е случајот и со светите маченици. 

„Настана Преполовение на деновите до Педесетница, во кое Христос делумно ја покажа Својата божествена сила, кога со збор го исцели раслабениот и го крена од одарот и, правејќи чудо во телото на еден човек, на луѓето им дарува вечен живот и милост голема“ (стиховна стихира на Вечерна од Преполовение).

На 06.05.2015 година, кога ги прославивме двата големи празници, Преполовение и св. вмч. Георгиј, во манастирот „Св. вмч. Георгиј“ во Рајчица, Дебар, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, еромонасите Доситеј, Макариј и Ефросиниј, свештеникот Димче Азески и ероѓаконите Порфириј и Силуан. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон многубројните верници со пригодна беседа, која во целост ви ја пренесуваме.

„Откако со доблесните страдања направи уште подобри дела, плодовите од твоите подвизи Му ги принесе на Христа, преблажен маченику! Откако желбата ја поткрепи со вера, стравот со надеж го отфрли, љубовта небесна ја заработи, сефален Георгие! Затоа, имајќи смелост, со благопријатните молби проси мир за душите наши, очистување на гревовите и милост голема“ (литијна стихира на Вечерна богослужба на св. вмч. Георгиј).

Во средата од четвртата седмица по Пасха го прославуваме светото Преполовение, празник кој ги поврзува светата Пасха и Педесетницата. двата големи празници кои се соединети и поврзани еден со друг. Со прославувањето на Преполовението, ние всушност Го прославуваме Спасителот, Господ Исус Христос, но и ја нагласуваме важноста на овие два големи празници. Оваа година, на овој свет ден, на 06.05.2015 година, го прославивме и споменот на светиот великомаченик и победоносец Георгиј, храбриот маченик, кој ја изобличи нечестивоста на мачителот и Му принесе на Бога жртва благопријатна. Празнувањето на овие два празници започна со свечена Вечерна богослужба во манастирот „Св. вмч. Георгиј“ во Рајчица, Дебар, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, еромонасите Доситеј, Макариј и Ефросиниј, свештениците Никола Христоски, Благоја Спироски и Димче Азески, протоѓаконот Николче Ѓурѓиноски и ероѓаконите Порфириј и Силуан. Оваа свештена вечер, беше голема радост за сите присутни, но особено за сестрите од овој манастир, кои добија уште два силни борци против оној кој попусто непријателствува против нас. Имено, Митрополитот Тимотеј замонаши уште две монахињи, кои со негов благослов и благослов на игуменот Партениј, ги добија имињата Теодора и Макрина. По завршувањето на Вечерната. Митрополитот Тимотеј се обрати кон мноштвото верни со пригодна беседа, која интегрално ви ја пренесуваме.