НАЈНОВО ОД ДЕБАРСКО-КИЧЕВСКАТА ЕПАРХИЈА

„Откако си го озари умот со просвештение на Божествениот Дух, чесната царица, имајќи богомудри плодови, ги возљуби благолепието и убавината на Црквата Христова, благословувајќи Го, заедно со верните, Богочовекот Исуса“ (песна од Канонот на Утрена во Прва недела од Великиот пост.

На 20.03.2016 година, во Првата недела од Великиот пост, кога ја прославуваме победата над една од најголемите ереси во Црквата, иконоборството, во храмот „Св. вмч. Ѓорѓи“ во Охрид, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерите Никола Христоски и Димче Ѓорѓиески, свештениците Владо Недески и Роберт Илијевски и протоѓаконот Николче Ѓурѓиноски. Литургијата ќе остане засекогаш запаметена за дипломираниот богослов Павел Крцоски, кој од рацете на Митрополитот Тимотеј беше ракоположен во ѓаконски чин. Од името на Митрополитот Тимотеј и од сета Епархија, му го честитаме ѓаконскиот чин на Павел, со молитви кон Бога, Он да го води по патот на Неговите заповеди, на патот кон спасението. По завршувањето на Литургијата, Митрополитот Тимотеј му се обрати на мноштвото верни чеда со пригодна беседа, која во целост ви ја пренесуваме. 

„Ништо не можат да му сторат на маченикот лакот и, стрелите твои, непријателу на човековото спасение, бидејќи тој и по смртта живее и бдее, и им се противи на твоите злодела, за да го спаси секого што православно верува“ (песна од Канонот на Утрена на Тодорова сабота).

На 19.03.2016 година, во првата сабота од Великиот пост, кога го прославуваме споменот на светиот маченик Теодор Тирон, во храмот „Успение на Пресвета Богородица - Каменско“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерејот Никола Христоски, свештениците Димче Азески и Горан Ставрески, протоѓаконот Николче Ѓурѓиноски и ѓаконот Сашо Целески. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме. 

„Радувај се, Пречиста Владичице, очистилиште на светот. Радувај се, лествице, која со благодатта ги издигнуваш сите од земјата. Радувај се, мосту, кој навистина ги преведуваш од смртта кон животот, сите што тебе ти пеат“ (песна од Канонот на Пресвета Богородица).

На 18.03.2016 година, во петокот од Првата седмица на Великиот пост, во храмот „Успение на Пресвета Богородица - Каменско“ беше отслужено Мало повечерие, заедно со првиот Акатист на Пресвета Богородица, на кој чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерејот Никола Христоски. По завршувањето на Акатистот, многубројниот верен народ, со почит и молби кон Пресветата Мајка Божја, пристапи кон целивање на акатистната икона, просејќи од Пречистата застапништво пред Нејзиниот Син и наш Бог.

„Пазени со чесниот крст на Твојот Син, Владичице чиста Богородице, секој напад на непријателот сите лесно го одбиваме. Затоа, како што прилега, те именуваме блажена, како Мајка на Светлината, единствената надеж на душите наши“ (крстобогородичен на седални на Утрена во средата од прва седмица). 

На 16.03.2016 година, во Првата среда од Великиот пост, во храмот „Успение на Пресвета Богородица - Каменско“ во Охрид, беше отслужена света архиерејска Литургија на претходноосветени дарови, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандрит Нектариј, протоереите Никола Христоски, Димче Ѓорѓиески и Игор Никовски, свештениците Димче Азески и Горан Ставрески, протоѓаконот Николче Ѓурѓиноски и ѓаконот Сашо Целески. По завршувањето на Литургијата, оние кои три дена се воздржуваа од секакво јадење и пиење, најпрво се причестија со Телото и Крвта Христови, а потоа и примија од светата вода - агиазма. Митрополитот Тимотеј се обрати кон верниот народ со пригодна беседа, која подолу интегрално ви ја пренесуваме.

„Засветли благодатта Твоја, Господи, засветли просвештението на душите наши. Ова е време благопријатно, ова е време за покајание; да ги отфрлиме делата на мракот и да се облечеме во оружјето на Светлината; и, откако ќе ја препливаме големата морска ѓир на постот, да стигнеме и до тридневното Воскресение на Господа и Спасителот наш Исус Христос, Кој ги спасува душите наши“ (стиховна стихира на Вечерна од Недела сиропусна).

На 13.03.2016 година, во вечерните часови, во храмот „Успение на Пресвета Богородица - Каменско“ во Охрид, според веќе одамна воспоставената традиција, беше отслужена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоереите Никола Христоски и Игор Никовски, свештеникот Димче Азески, протоѓаконот Николче Ѓурѓиноски и ѓаконот Сашо Целески. По завршувањето на Вечерната богослужба, се помоливме на Господа за Он да ни даде сила и благодат за добро да го започнеме Велигденскиот пост, но и вистински да го изодиме патот на покајанието. На крајот, со благослов на Митрополитот Тимотеј, свештеникот Димче Азески се обрати со пригодно слово кон многубројниот верен народ, а потоа и сите еден од друг побараа прошка за направените гревови и престапи, та очистени од секаков грев и горчина, да влеземе во овие денови на пост и покајание, а Семилостивиот Бог да нè удостои да го дочекаме и светото Христово Воскресение.