НАЈНОВО ОД ДЕБАРСКО-КИЧЕВСКАТА ЕПАРХИЈА

На 06.12.2016 година, се упокои во Господа свештеникот Марко Трпкоски од Македонски Брод. Отец Марко е роден во 1960 година, од благочестиви родители во селото Брест, Македонски Брод. Завршил во МПБ „Св. Климент Охридски“ во Скопје, а по стапувањето во брак, во 1982 година, најпрво е ракоположен за ѓакон, а потоа и за свештеник, во храмот „Успение на Пресвета Богородица“ во Македонски Брод, каде служеше до неговото упокојување. Опелото на отец Марко го изврши Неговото Високопреосвештенство Митрополитот Дебарско-кичевски г. Тимотеј, во сослужение на повеќе свештенослужители од нашата Епархија, на 07.12.2016 година во храмот „Успение на Пресвета Богородица“ во Македонски Брод, каде што и свештеникот Марко веќе 34 години верно служеше на Македонската православна црква и на Бога. Митрополитот Тимотеј се обрати кон ужаленото семејство и кон присутните со пригодна беседа, која ви ја пренесуваме во целост.

„Духовно поткрепуван, си ги презрел болките што ти биле нанесувани со разните средства (за мачење), поради тоа што не им принесуваше пофалба на глувите идоли, туку на Христа Бога. Откако со љубов ја сочува верата во Него, Георгие, си говорел: Дела Господови, пејте Му на Господа, и превозносете Го во сите векови“ (песна од канонот на Утрена на св. вмч. Георгиј).

На 09.12.2016 година, денот кога го празнуваме споменот на св. вмч. Георгиј и преп. Алимпиј Столпник, во храмот „Св. вмч. Георгиј“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофорите Сашо Богданоски и Димче Ѓорѓиески, протоереите Никола Христоски и Игор Никовски, свештениците Димче Азески, Љупчо Бакрачески и Зоран Ставрески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме.

„Откако си проникнал во бездната на Божјата Премудрост, оттаму си го нацрпил богатството на божествените Писанија, со кое, Клименте семудри, елинскиот глас си го појаснил со македонскиот јазик. Затоа со љубов те славиме“ (стихира по Евангелие на утрена на свети Климент Охридски).

Рамноапостолниот ревнител, Климент Охридскиот Чудотворец, безброј луѓе изведе од прелеста, непрестајно поучувајќи ги во законот Божји и со својот чесен живот упатувајќи ги кон божествената наслада. Затоа, и ние денес, со љубов го славиме споменот на светиот епископ наш Климент, кој ја преведе во вистинската вера цела Македонија.

Празнувањето на споменот на светиот Климент започна ден претходно, во манастирот „Св. Климент и Пантелејмон“ Плаошник во Охрид, со свечена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофорите Сашо Богданоски и Димче Ѓорѓиески, протерејот Никола Христоски, свештениците Димче Азески, Горан Ставрески и Роберт Илијевски, протоѓаконот Николче Ѓурѓиноски и ѓаконот Сашо Целески. По завршувањето на Вечерната, пред моштите на светителот, беше отслужен и Молебен на свети Климент Охридски.

„Девојки со запалени свеќи, светло ја придружуваат Приснодева, и вистински, преку Духот, ја претскажуваат иднината, бидејќи Богородица, која и самата е храм Божји, како дете со девствена слава, во храмот се воведува“ (хвалитна стихира на Утрена на Воведение на Пресвета Богородица во храмот).

Денес се отвораат портите на храмот, за да влезе другиот храм, кој во себе Го носеше Царот на сите. Затоа и сите верно ја прославуваат поголемата од херувимите и пославната од серафимите - Мајката Божја, која стана и Мајка и застапничка за сиот човечки род. Нејзините застапништва, како пријатен темјан, ги изгонуваат непријателските сили и се помош за сите кои со вера и побожност ја повикуваат Пречистата во своите молитви. Затоа и ние денес да ја величаме Мајката Божја и да и запееме: Радувај се, седобра Невесто, повозвишена од сите!

На овој голем празник, на 04.12.2016 година, во храмот „Успение на Пресвета Богородица - Каменско“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на свештениците Димче Азески, Горан Ставрески, Владо Недески и Ѓорѓи Блажевски, протоѓаконот Николче Ѓурѓиноски и ѓаконот Сашо Целески. По завршувањето на Литургијата, на која речиси сите се причестија, Митрополитот Тимотеј се обрати кон мноштвото верни со пригодна беседа, која интегрално ви ја пренесуваме.

„Со хоровите на бесплотните, дојдете и сите луѓе, да се поклониме на овој празничен ден, славејќи го споменот на мудрите архангели Христпви, пеејќи: Свет, Свет, Свет си, Боже на нашите татковци“ (песна од канонот на Утрена на Собор на св. Архангел Михаил и другите бесплотни Сили).

На 21.11.2016 година, на денот кога го прославуваме празникот Собор на светиот Архангел Михаил и другите бесплотни Сили, во манастирот „Св. Наум Охридски“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, игумен на манастирот, протоереј-ставрофор Димче Ѓорѓиески, протоерејот Никола Христоски, протоѓаконот Николче Ѓурѓиноски и ѓаконот Сашо Целески. По завршувањето на Литургијата, беше прекршен празничниот колач, а Митрополитот Тимотеј се обрати кон верниците со пригодна беседа, која интегрално ви ја пренесуваме.