НАЈНОВО ОД ДЕБАРСКО-КИЧЕВСКАТА ЕПАРХИЈА

„Денес се јави нашиот отец и голем застапник, и просветител, јасниот Наум. Пријдете да се собереме, мноштва мизиски, и да му се радуваме, бидејќи тој сите нас нѐ просветли, и мракот на прелеста го разруши. Тој Го следеше Христа и себе се предаде за жртва благопријатна. Тој, и неговиот многуславен спомен и празник, сега на сите верни им предлага духовна гозба. Затоа со љубов да го прославиме. 

Просветителот и оној кој на сите кои со вера ќе го повикаат им приоѓа на помош, преподобниот Наум Охридскиот Чудотворец, и оваа година беше прославен со молитви и големи почести. Неговите светли подвизи, надалеку прочуени, и оваа година привлекоа огромен број верни од цела Македонија, но и надвор од неа, кои дојдоа да му се помолат и поклонат на Црноризецот. Реката верен народ, која трпеливо чекаше пред Светинаумовиот манастир, уште еднаш потврдува дека Бог е голем во неговите светии, а чудата на овој наш застапник ја покажуваат силата на молитвата и подвизите.  

Празнувањето на преподобниот Наум Охридски, започна ден претходно, во манастирот „Св. Наум Охридски“ во Охрид, со свечена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на Неговото Високопреосвештенство Митрополитот Повардарски г. Агатангел, архимандритот Нектариј, игумен на манастирот, свештениците Димче Азески, Владо Недески и Роберт Илијевски, еромонасите Ефросиниј и Кирил, протоѓаконот Николче Ѓурѓиноски и ѓаконот Сашо Целески. По завршувањето на Вечерната богослужба, Митрополитот Агатангел се обрати кон верниот народ со пригодно слово.

„Венец на благодатта си примил од Бога за твоите страдања, мудар Еразмо, и венчан си потрчал кон Христа, Кого што си Го посакувал постојано, откако си ја отфрлил распадливоста, и си викал: Сите дела Господови, благословете Го Господа“ (песна од Канонот на Утрена на св. свештеномаченик Еразмо Охридски).

Мудриот Еразмо, големиот подвижник и свештеномаченик, како добропослушен посредник на сите кои искрено и со вера побарале од него помош и застапништво, секогаш е прославуван достојно и со голема почит од нашиот верен македонски народ. Тоа го потврдија и илјадниците поклоници, кои дојдоа да му се поклонат на денот на неговиот спомен и да Го прослават Бога преку Неговиот светија. Споменот на светиот Еразмо Охридскиот Чудотворец, беше свечено одбележан на местото на неговото подвижништво, во манастирот „Св. Еразмо Охридски“ во Охрид. Празнувањето започна ден претходно, на 14.06.2017 година, со свечена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. тимотеј, во сослужение на протоерејот Никола Христоски, свештениците Горан Ставрески, Владо Недески и Роберт Илијевски, протоѓаконот Николче Ѓурѓиноски и ѓаконот Сашо Целески.

„Кога изворот на Духот дојде на земјата, разделувајќи се духовно во вид на огнени реки, ги пороси апостолите просветлувајќи ги, и беше како облак кој освежува. Преку него ние ја примивме благодатта, преку огнот и водата. Светлината на Утешителот дојде и светот го просветли“ (седален на Утрена во Понеделник на Светиот Дух).

На 05.06.2017 година, во Понеделник од Светиот Дух, во катедралниот храм „Св. Софија“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот Никола Христоски, свештениците Владо Недески, Ѓорѓи Блажевски, Љупчо Бакрачески и Роберт Илијевски, протоѓаконот Николче Ѓурѓиноски и ѓаконот Сашо Целески. По завршувањето на Литургијата, Митрополитот Тимотеј се обрати кон верниците со пригодна беседа, која ви ја пренесуваме во целост.

„Во спомен на спасоносните зборови, слушнати од Отецот и предадени на апостолите, Христос Го испраќа Духот во вид на огнени јазици; а созданието, преку преобразеното присуство, Ти пее: Господи, благословен си“ (песна од Канонот на Утрена на Педесетница).

На 04.06.2017 година, во Неделата на светата Педесетница, во храмот „Св. Троица“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, свештениците Кирил Јованоски, Ромео Петрески и Владо Недески и протоѓаконот Николче Ѓурѓиноски. По завршувањето на Литургијата, беше отслужена и Вечерна богослужба, на која беа прочитани коленоприклоните молитви на Педесетница. Потоа беше извршен чинот на Мал водосвет и беше прекршен празничниот колач, а се изврши и свечена литија околу самиот храм.

„Постојано озаруван со нематеријалната светлина на благодатта, си го примил свештеничкото достоинство, блажени Кириле, и, со помошта на Светиот Дух, си го пронашол словенското писмо, та, откако луѓето се просветлија со преводот на Боговдахновените книги на нивниот сопствен говор, да пеат: Сите дела Господови, благословете Го Господа“ (песна од Канонот на Утрена на светите Кирил и Методиј).

И оваа година, Македонската православна црква - Охридска архиепископија, со сите свои верници, не го заборавија делото на светите браќа, нашите и сесловенските просветители. Така, по повод празникот на светите браќа, а со Одлука на САС на МПЦ-ОА, беше испратена делегација на вечното почивалиште на светиот Кирил во Рим. Делегацијата ја сочинуваа: Неговото Високопреосвештенство Митрополитот Дебарско-кичевски г. Тимотеј, кој беше и водач на делегацијата, Митрополитот Европски г. Пимен, свештениците Роберт Илијевски и Александар Матески и ѓаконот Сашо Целески. На денот на светите просветители, беше отслужен Молебен на гробот на светиот Кирил, а по Молебенот, Митрополитот Тимотеј се обрати кон присутните со пригодна беседа, која интегрално ви ја пренесуваме.