НАЈНОВО ОД ДЕБАРСКО-КИЧЕВСКАТА ЕПАРХИЈА

„Кога го видоа гробниот влез и, не поднесувајќи го блесокот на ангелот, мироносиците со трепет се чудеа и говореа: Зар е украден Оној што на разбојникот рајот му го отвори? Или, пак, стана Оној Кој и пред страдањето проповедаше Воскресение? Навистина Воскресна Христос, давајќи им на оние во адот живот и воскресение“ (седален воскресен глас 4, во Недела на утрена).

Црковниот живот на просторите на Дебарско-кичевската епархија има свои корени уште од ранохристијанскиот период, но особен печат, како своја „домашна“ црква, остава Охридската архиепископија. Иако не секогаш била во својот најголем подем, и не секогаш била раководена од свои словенски архиереи, споменот за неа и духовните традиции што таа ги испишала врз „плочките од срцето“ на верниот народ никогаш не исчезнале од колективната и црковната меморија на жителите на овие простори. И токму на тие црковно-духовни традиции се темели и Дебарско-кичевската епархија, која минатата 2017 година го прослави 50 годишниот јубилеј од нејзиното формирање како таква. За доброто на епархијата и за доброто на верниот народ се грижеле многу луѓе, на кои никогаш нема да им го заборавиме делото, но кога денес ќе се спомне Дебарско-кичевската епархија, како што кажа и нашиот теолог и професор, м-р Виктор Недески, таа се поистоветува со Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј. И тоа не е случајно. Митрополитот Тимотеј раководи мудро со епархијата повеќе од 37 години, а во негово време се обновени и изградени најголемиот број од црквите, манастирите и конаците. Неговата, пак, дејност, не застанува само со градителската грижа. Митрополитот Тимотеј низ сето свое архипастирствување посветува особена грижа на воспитувањето и образованието на нови кадри, а не помал труд има вложено и во издавањето на голем број богословска литература, стручно-научна и пастирска, од која богословите и верниците можат да ги надградуваат своите знаења и да се поучуваат. 

Македонската православна црква - Охридска архиепископија, односно Дебарско-кичевската епархија Охрид, има особена чест да Ве покани на промоција на книгата ДЕБАРСКО-КИЧЕВСКА ЕПАРХИЈА (1967-2017), на 16 декември 2018 година, во катедралниот храм „Св. Софија“ во Охрид. Овој голем ден за нашата Епархија, но и за нашата Македонска црква, ќе започне со Утрена богослужба во 07.30 часот, а во 08.45 часот ќе биде дочекот на Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, заедно со Архиереите на МПЦ-ОА. Во 09.00 часот ќе започне светата архиерејска Литургија, на која ќе чиноначалствува Неговото Високопреосвештенство Митрополитот Дебарско-кичевски и Администартор Австралиско-сиднејски г. Тимотеј, во сослужение на останатите Архиереи на МПЦ-ОА, а во присуство на Архиепископот Стефан. Во 11.00 часот ќе биде промовирано капиталното дело ДЕБАРСКО-КИЧЕВСКА ЕПАРХИЈА (1967-2017), кое претставува шематизам на Дебарско-кичевската епархија, а кое се издава по повод 50 години од формирањето на Дебарско-кичевската епархија. Промотори на делото ќе бидат: академик Таки Фити, Претседател на МАНУ и Епископот Хераклејски г. Климент. Со Вашето присуство уште повеќе ќе го збогатиме овој настан, а сите заедно, преку учеството на Литургијата и учеството во светиот Путир, ќе се покажеме како едно тело, чија глава е Христос, нашиот Спасител. 

„Венценосецу Георгие, стоејќи целиот светол пред чесниот престол на Оној што владее со сите, со твоите молитви и застапништва запази ги тие што со топла вера и љубов те призиваат тебе, Христов маченику“ (песна од канонот на Утрена на св. вмч. Георгиј Победоносец).

На 09.12.2018 година, во Дваесет и осмата недела по Педесетница и на денот кога го прославуваме споменот на светиот вмч. Георгиј Победоносец, на преп. Алимпиј Столпник и на преп. Стилијан, во храмот „Св. вмч. Георгиј“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски, Сашо Богданоски, Димче Ѓорѓиески и Игор Никовски, свештениците Димче Азески и Сашо Целески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која ви ја пренесуваме во целост.

„Светлозарен Клименте, од запад засветли повеќе од сонцето, испуштајќи зраци од твоите зборови и просветлувајќи ги краиштата на вселената и, откако стана непоколеблива кула на Црквата и неподвижен столб, блажени, и со твоите покајни зборови го сврте сето напредување на еретиците“ (хвалитна стихира на Утрена на св. Климент Охридски Чудотворец).

Пастирот на Македонската православна црква - Охридска архиепископија, таткото на Охридската Црква, светиот Климент Охридскиот Чудотворец, и оваа година беше торжествено прославен во манастирот, кој по неговите молитви стана духовно лечилиште за оние кои му пристапуваат со вера. Празнувањето на неговиот спомен започна ден претходно, на 07.12.2018 година, во Светиклиментовиот манастир на Плаошник во Охрид, со празнична Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Никола Христоски, Ристо Ристовски, Димче Ѓорѓиески и Игор Никовски, свештениците Горан Ставрески, Ѓорѓи Блажевски и Сашо Целески и ѓаконот Христијан Костоски. По завршувањето на Вечерната богослужба, беше отслужен Молебен на свети Климент Охридски, пред неговите свети мошти.

„Стариот закон, Пречиста, преславно те предвидуваше како скинија и божествен сад, необичен Ковчег и царска завеса, и жезол, храм неразрушлив и врата Божја. Затоа нѐ учат да ти викаме: Навистина си повозвишена од сите, Дево Пречиста“ (песна од канонот на Утрена на Воведение на Пресвета Богородица - Пречиста).

На 04.12.2018 година, на празникот Воведение во храмот на Пресветата Владичица наша Богородица - Пречиста, во храмот „Успение на Пресвета Богородица - Каменско“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Никола Христоски и Ристо Ристовски, свештениците Димче Азески, Горан Ставрески, Ѓорѓи Блажевски, Љупчо Бакрачески и Сашо Целески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која ви ја пренесуваме во целост.